Секоја година во април ги продава една жена лалињата од бавчата во општината Ѓорче Петров. Тоа лале поубаво од сите лалиња на пазарот чини 50 денари, вредност што повеќекратно ја надминува цената. На светот нема поубаво и поевтино лале. Ова исто така значи дека кај нас сѐ успева доколку има кој да го засади или одгледува.

Договорот што го потпишаа Фатих Шахбаз, од Халбанк и Никола Кимовски од МНТ е многу важен за културата во државата. Тоа значи константно инвестирање во културата што има посебно место во мисијата на оваа банка, со што се вложува во идентитетот на една нација. Така бизнисот и културата се сплотуваат за побогато општество, соработуваат за нова енергија и нови идеи. Целта е заедничка активност за приближување на театарот до пошироката публика и инвестирање во тоа, што не е само формален чин.

Премиерата на вториот дел од сега култниот филм Ѓаволот носи Прада правен по романот на Lauren Weisberger ќе ја има својата премиера на 29 април и во нашите кино сали. Дали ќе ја достигне славата на првиот дел, не може да се заклучи од трејлерот, но промоцијата не е помалку гламурозна. Истата актерска екипа ветува.

Неколку излози што најавуваат нова сезона влеваат надеж дека ќе има друг пристап кон излогот како важен дел од естетскиот изглед на продавниците. Излогот на Фешн и Френдс во Ист гејт мол и излогот на Сара Фешн Хоум во ГТЦ се добри примери за тоа.

Неговиот мурал на приземјето на ГТЦ на трасата по која одеше автобуската линија 57 зборува многу за овој уметник. Неговиот  исклучителен начин на сликање, можете да го видите на неговиот инстаграм профил davorkeskec.

И оваа пролет мокасините ќе се борат со новите пониски поравни верзии на патиките Adidas. Новата верзија на Gazelle Lo Pro Lace Pink варијантата оди чекор понатаму. Тоа е романтична пролетна верзија на оваа патика во светло розова боја со тантели, што ја следи тенденцијат на пастелни бои во облеката на сезоната.

Авторката има нова книга за која не се зборува толку како за револуционерната Сексот и градот што разоткри многу дилеми во врска со односите и ноќниот живот во Њујорк. Книгата што може да се купи кај нас издадена од Арс Ламина е со наслов Има ли се уште секс во градот? Нова страница во животот на градот и можеби нова идеја за култна серија.

Една од ретките обвинителки со интегритет што не се плашеше да се спротивстави, да се покаже во јавност, откако ѝ беа одземени важни предмети што требаше да ја гонат ВМРО – ДПМНЕ или случаите Талир 1 и 2, си поднесе оставка на функцијата. Кој може да го издржи притисокот и хајките, допрва ќе се раскажува.

Новиот државен јавен обвинител освен дискутабилни одлуки покажа стил што не одговара на неговата нова функција. За него допрва ќе се зборува, дури откако ќе се ослободи од кадифени сакоа, пепито кошули, брошови, нараквици, шамивчиња, кравати и сите други украси, што не се совпаѓаат со одлуките што досега ги донесе. Нема место за оптимизам и веселба, на што асоцира неговата облека.

Министерот е една од ‘ѕвездите‘ на оваа власт што е само по себе факт за тоа во каква состојба е државата и со какви политичари се гордее. Човекот што некогаш велеше дека немал време на време да заврши факултет зашто многу млад имал високи политички функции. За пратеник еднаш не се бараше завршен факултет ниту да бидеш полнолетен и образован.

Новоновинарството или замената за вистинско интервју треба сериозно да се стави на испит: кои се овие луѓе што седат пред микрофони и за што служат нивните ‘разговори‘ со луѓе од јавниот живот. Ландов или неговиот Претрес е само еден лош пример што треба да се анализира.

Македонскиот премиер ќе биде во оваа рубрика на десната страна, сѐ додека продолжува да не покажува минимум добра волја, добронамерност, оптимизам и почит кон сите што не се од неговата партија и не се негови гласачи. Притоа, зборува за татковината, не прашувајќи ги граѓаните за ништо. Точно е дека надвор од татковината секогаш ќе бидеш странец, освен ако во сопствената држава не си поголем странец. Притоа, треба да размисли дали УЈП треба да ги даночи парите на студентите заработени преку Work& Travel

Скопје е при крај со шансите во него да се живее како и во секоја друга метропола. Градењето, уништувањето на зеленилото, погрешните избори, го чинат кредибилитет секој нареден потег за негово промовирање како функционален град. Поважно е како го доживуваат граѓаните што дишат загаден воздух, отколку дали им се допаѓа на туристите што во него поминуваат два дена.

Случајот со злоставуваната Ивана отвори многу прашања за нас како народ. Зошто никој не го спречил злоставувањето и каква е намерата на душегрижниците, што сега морализираат за сега веќе починатата Ивана што во смрт го однесе и своето дете. Сето заедно зборува за државата што не презема ништо, многу повеќе од она што имаме храброст да признаеме. Сите знаеле, никој не можел да спречи! Еднаш ќе мора со име да се посочи виновникот за секој поединечен случај на фемицид.

Законот за пушење беше добра реклама што не успеа. Сѐ уште ќе чади каде што се јаде за да не се намали бројот на оние што сакаат да чадат додека јадат. Да се забрани пушење во затворени простори и тераси било лошо за бизнисот, а никој не потенцира дека пушењето е многу полошо за здравјето отколку за бизнисот.

Труењето со храна во оваа држава не е ништо ново и обично се заташкува. Овојпат труењето на работниците во РЕК Битола што надмина 170 вработени  беше многу масовно, па не можеше да се заташка. Покажа само уште еднаш кој прави храна, кој продава храна и кој мора да ја јаде. Ништо чудно кога и во супермаркет никој не ја гледа храната што одамна имала поминат рок, а сѐ уште се продава.