Добри ли сте?
1. ЗА 2028 И СКОПЈЕ, СЕ УШТЕ СЕ МОЛЧИ
Постојано треба да се предупредува на фактот дека за титулата на градот Европска престолнина на културата, се уште никој не зборува и далечна им се чини 2028 година. Нема никакви податоци за тоа до каде е со програмата, кои се луѓето задолжени за нејзина реализација или координативното тело, што се случува со објектите каде што треба да се реализира и дали како со се‘ што се случува во културата, што впрочем се случи со штандот на Македонија на Експо во Јапонија, ќе се прават сериозни грешки што никој нема да ги признава.
2. ШТО СЕ СЛУЧУВА СО МКЦ?
Како голем скандал беше дочекано присуството на Аца Лукас во МКЦ, што секогаш се сметаше за место каде што се промовираше се‘ што е авангардно во културата. Едно исклучително важно место за културата во градот е запоставено и не се спомнува ниту по повод гореспоменатиот контекст. Последни податоци и во медиумите се во февруари, кога беше повторно посочено дека во декември 2024, одбор во Европската Комисија (ЕК) изразил загриженост од информациите кои ги добил од претставници од Македонија за активностите околу организирањето на настанот Скопје Европска престолнина на културата 2028. Она што е прво неопходно да се направи со МКЦ е темелно да се ИСЧИСТИ. Како и сите други објекти каде што треба да се реализира програмата во 2028.
3. ДА СЕ ИСЧИСТИ И ДА СЕ ИСЧИСТИ!
Всушност, лесно е да се направи план за културните настани во 2028, откако ќе се направи список на објекти каде што ќе се резлизира и секој да си ја преземе одговорноста за објектите со кои се раководи. Еден од објектите е секако МКЦ, платото пред него, тревникот зад него каде што веќе се организирани проекции на филмови на големо платно и под ведро небо. Киното Фросина, фоајето, беа исто така места за промоција на наши артизанери и проекција на филмови. Но и за овој дел од МКЦ стои исто така неопходноста прво да се уредат и ИСЧИСТАТ.
4. ИМА ЛИ ВРЕМЕ И НАДЕЖ?
Она што може да се направи за да се тргне од некаде во обезбедување услови за реализирање на културната програма и оспособување на објектите, е активирање на волонтерството. Уметниците, разни културни работници, администрацијата во општините и Градот, сите може да се вклучат за да се започне од некаде. Секој од културните објекти што се под нечија надлежност треба да престанат да ја префрлуваат одговорноста, зашто времето тече. Во очекување на нов извештај и препораки од Одборот во Европската комисија, очекуваме одговори од министерот за култура и градоначалничката на градот.